TURA: South Garo Hills a·jani Chokpot jolo donggipa Dareng chiringoniko niam gri ro·ong bikotenga ine matnangenba, jolo songdongenggipa manderang, Mongolbar salo jinma tom·bimonganiko ong·atenba, jegalanirangko dakangtokaha.
Ia tom·bimonganiko Budugre Village Environment Protection Committee aro Chokpot Area Vigilance Committee, jolo songdongenggipa manderang baksa nangrime ong·atangaha.
Ia dolgni NGO-rangni parakatani gitade, ia jolo ro·ong bikotna gita songni manderang aro Budugre songni Nokmaba No Objection Certificate (NOC)-ko on·jahachim indiba mitam manderang manigija, adita bilsirangna skangan ia biaponiko niam gri ro·ong bikotna a·bachengaha.
“Ia Dareng chiringonikon ka·ma jolrango donggipa dam 20 songni manderang ringna aro dingtang dingtang kamrangna jakkalengachim indiba ia chiringonikon niam gri ro·ong bikotengani a·sel songni manderang neng·nikanirangko man·engahani giminsa da·alo jolni manderang jinma tom·bimonge jegalanirangko dakenga,” ine dolgni NGO-rang parakataha.
Ia biaponiko niam gri ro·ong bikotengani gimin Environment, Forest & Climate Change department-rangna agreba, South Garo Hills a·jani Deputy Commissioner, Chokpot-ni SDO, jolni police-rang aro GHADC-naba badi ka·doangachim indiba da·alonan ia biapo niam gri ro·ong bikotaniko champengna maming ja·kurangko de·kujaenga ineba jolni manderang parakataha.
Ia chiringoniko niam gri ro·ong bikotaniara Budugre a·kingo donggipa buring bolgrimrangnasan ong·aigija Dareng chiring samba jolrango donggipa pilak biaprangnan nangchakeaniko ra·bagen ineba dolgni NGO-rang, suk ong·gijaniko parakataha.
