SHILLONG: Assam aro Meghalaya a·dokni simarango meligrikna man·jaenggipa bangki damdok biaprangni a·dok damgnini sorkarirang, Meghalaya Assembly-ni Budget Session matchotani ja·man agangrikna a·bachengtaignok ine Sukrobar salo, a·dokni Tourism Minister aro a·dok sorkarini ku·wattimgipa Paul Lyngdoh parakataha.
“Assembly-ni budget session matchotahaon chinga simani bidingo agangrikaniko a·bachengpiltaignok,” ine Lyngdoh, kobor ra·timgiparangna aganaha.
Mukroh songko Assam a·dok ning·o ga·aka ine adita salrangna skang Assam-ni chief minister Himanta Biswa Sarma-ni a·kanggipani bidingo janapatengon, “Angni agangimin gitan chinga chanchirimaniko a·bachengna tik ka·manaha aro da·o bangki damdok jolrang dongkuenga. Jeba jekoba agannade man·aia indiba sawa a·ani nokgipara ong·a, unosa ia sorkaride pangchake kam ka·gen. Ia kamko ka·na gita an·chingna lekkarangko chu·onga gitan nanga. Aganade altuaia indiba lekkarangchisa chinga kamko ka·na miksongenga,” ine Meghalaya sorkarini ku·wattimgipa parakataha.
Iandake dolgni a·kanggrikanichi simani bidingo agangrikanina maming nangchakeaniko ra·bajawama ine sing·on, da·o dipet simarangko name tik ka·kujaengani giminsa dolgnian songrangko a·kanggrikenga indiba simarangko name sualahaode iandake a·kanggrikani dongjawaha ine Lyngdoh parakataha.
A·dok damgnini gnigipa agangrikanina da·o dipet Cabinet, regional committee-rangko songpiltaiani gimin chanchirima dongkuja ineba ua aganaha.
“An·chingo kam ka·na gita damdok biaprang dongkuenga inesan chinga da·alo chanchirimaiaha. Uni gimin mai dakgipa ja·kurangko ja·mano de·anggen, uade cabinet-osa pangchakaigen,” ine Lyngdoh parakataha.