SHILLONG: Meghalaya a·doko drugs ba pekatgipa sam badinganirangko rim·na man·engani gimin Mongolbar salo, Umsning-ni Congress MLA Dr Celestine Lyngdoh, police-rangko mittelpilangenba, a·doko niam gri koela salgiparangko rim·na man·jaengani gimin sing·doangskaaha.
“An·chingni police-rang, bang·gija samrangkon rim·na gita man·engon maini gimin saljrakjrako ton 30 ong·pilgipa koelarangko an·chingni ramarang gita salangenggipa truck garirangkode rim·na man·jaenga anga an·tangde ma·sija,” ine Assembly budget session-ni gnigipa salo, Dr Lyngdoh aganaha.
A·doko mining policy dongjani a·selan gong kror 1000-rang ong·pile a·dok noksan ong·na gita nangenga ineba Congress MLA parakataha.
Iako chanchirimna ra·baanichi ua koela badingenggipa manderangni kosako re·enga ong·ja ine janapatengon, a·doko niam gri koela badinganiko NGT-ni champengatani ja·manoba koelani kamrangko ka·kuenganichi songni nokni manderangna kam ka·e cha·ani cholrangko on·kuengani gimin ua uamangko mittelpilnasa ska ine Dr Lyngdoh parakataha.
“Angni sing·anide an·ching a·doktangna noksan ong·atpile niam gri koela bikotaniko dakna on·kuaigenma? A·dokna noksan ong·atpile an·ching dolsa manderangko niam gri badingna on·kuaigenma? Ia sing·anirangko Assembly aganchakna nanga,” ine Dr Lyngdoh aganaha.
Indake ong·engon, uni constituency-de national highway-o ga·akgipa biaprangan ong·ani gimin niam gri koela saruraani dongja ine agananiko ua aro uni manderangde bebera·na man·jawa ine Umsning MLA parakataha.
A·dokni namgnina a·dok sorkari, niamo pangchake koela bikotaniko a·bachengatna man·gen aro a·doko tangka paisarangko man·dapna NGT-ni nangnikani gita mining policy-ko ta·raken ra·bana man·gen ineba Lyngdoh, an·tangni ka·dongchakenganiko parakataha.
A·dok damgnini simarango so·sojengjeng ong·enggipa biaprangko namatna kam ka·anio maming gualanirangko dakjachina gitaba ua a·dok sorkariko didiataha.
“An·chingo so·sojengjeng ong·enggipa bangki damdok biaprang dongkuengpiti aro anga ka·donga a·dok sorkari, skanggipa damdok biaprangko namatna kam ka·anio dakgualanirangko ia changode dakjawaha,” ine Umsning-ni Congress MLA aganaha.