U·IATTIMGIPAONI
Shillong: Ru·utgija salo Police Bazar-ni Hotel Pegasus sepango bilsi 25 ong·gipa pante Zacharia Sohthiang-ko den·gipako ma·sina aro rim·na jotton ka·enga ine Deputy Chief Minister, Home (police) department-ni incharge, Prestone Tynsong aganaha.
“Ua a·sel ong·a chongmotko jensalo sandie man·a pilak daitoko jako ra·giparangna u·iatgen,” da·o ong·enggipa Assembly budget session-o ua a·selni gimin Mawlai-ni MLA Brightstarwell Marbaniangni Zero Hour-o sing·ao Tynsong aganchakaha.
Ua a·sel ong·aniko social media-rango watjachina aro niamko an·tangtango ra·jachina ua pilak songpanggiparangko mol·molaha.
A·sel chongmotko sandina aro den·a man·gipana kakket bichalko on·a police kam·enga Deputy Chief Minister ka·dongataha.
Indakgipa a·sel ong·e songjinmao manderangna kenchakani aro chanchina nangani ong·a ine a·bachengao Marbaniang aganaha.