U·IATTIMGIPAONI
Baghmara: Sima ari jol sepangjolo donggipa manderang baksa meli-nangrimaniko bariatna re·mikkanganio, BSF-ni 170 battalion, South Garo Hills-ni Bangladesh border sepanggipa jol Mahadeo songo medical camp-ko aro Civic Action Program (CAP)-ko ong·atangaha.
Programme-o Kanai, Maheshkola, Ganganagar, Bagli, Nikora, Patlaban, Karaibari aro Mahadeo songrangoni komibeoba sak 200 manderang bak ra·tokangaha. Deputy Commandant AS Khan aro assistant commandant Nimish- uamangba bak ra·angaha.
Songni nokmarang, school headmaster, teacher aro school poraigipa chatro-chatrirang bang·an CAP-o aro medical camp-o bak ra·angtokaha.
Programme-o school-na stationary, plastic chairs, sports item ba kal·susani bosturangko, CGI sheets, plastic Syntex, indine sannani samrangko ba uandakgiparangko suale on·angaha.
Uandake programe-ona re·bagiparang, BSF-ni kam ka·anirangko de·mittelangaha.