U·IATTIMGIPAONI
SHILLONG: Sorkarini tangka-paisa chama (budget) minganti manderangna chamaha manderangni tangka-paisaan ong·a indiba dal·batgipa sing·anide maikai ua chamatgipa tangka-paisako kam ka·nasienga aro manderangni namgni neng·nikani ong·skagenma Congress MLA Saleng Sangma aganaha.
Mijalo kobor ra·timgiparangna aganao sorkari ua chamgipa tangka-paisakora lekkaosan kam ka·nasiengama ba ka·bebegenma mongsonggipa sing·anide ong·enga ine Sangma aganaha.
Tangka-paisa chamaniko mesokgipa kamrangko ua namnikaha, sorkari lak 5 kamrangko on·a ku·rachakaha indiba chongmot kamko namen ma·sienga ia apsan MDA sorkari uamangni batanggimin sasono dingtang dingtang department-rango hajal hajal bangbang ong·e dongenggipa kamrangko gapatna dongja ine ua aganaha.
“Unagreeba bang·a department-rango somai gita dormaharangko man·ja aroba skigiparangna dormaharangko on·a dongkujaenga,” indide agane uamangni manderangoniko man·a nangchongmotgipako man·aha uni gimin Budget-o uamang maiko ku·rachakahachim uko sorkari chu·sokatna nangchongmota, ua agandapaha.
A·dok sorkari Meghalaya-ko 10 billion dolar tangka-paisa chamaniko tariaha aroba sorkari gong kror 1.592 bilsina komie tangka-paisa chamaha jeon GSDP-ni 3.42%-mang ong·a, ua aganaha.
Meghalaya Youth Policy-ni ning·o changa-sapanirangko skie ra·na sak 10,000 chadamberangko training-na sorkari gong kror 10-ko on·aha.
