SHILLONG: Batanggimin bilsignini gisepo Meghalaya a·dokni pilak lower primary (LP) skulrangko man·gope ge 1,002 kamrang bangbang ong·e dongenga ine Sombar salo, a·dokni Education Minister Rakkam A Sangma, Assembly-na parakataha.
Assembly-o Gambegre-ni Congress MLA Saleng A Sangma-ni sing·anina ua iako parakataha.
“Pilak nanga kamrangko matchotani ja·man ia kamrango skigiparangko ra·na a·bachengatgnok. MTET pass ka·gimin skigiparangko kamo ra·ani ja·manchakengani gimin skigiparangko temporary basis-o watatchengna sorkari tik ka·aha,” ine Education Minister aganaha.
Skigiparangna aro mongsongbate SSA skulrango skigiparangna ma·mong sorkarioni tangka paisarangko somoi gita watatjani a·sel skigiparangni neng·nikanirangko namatna gita special fund-na sorkari maiba niamko ra·gatna miksonganirang dongama ine Nongstoin constituency-ni Congress MLA Gabriel Wahlang-ni sing·anina aganchakaniko on·angskaengon, da·o dipet iani bidingo sorkari cholrangko niengkua aro nanga gita ja·kurangko de·enga ine Sangma parakataha.
Meghalaya a·doko skulni gadangrang bang·dugaengani gimin skigiparangna kamni kri apsan dormaharangko on·na gita sorkario niamrang dongama ine Wahlang sing·skaon, da·o dipetde a·doko tangka paisani gita neng·nikanirang dongkuengani gimin iandakgipa niamrangko ra·gata dongkuja indiba tangka paisani gita obostarang namkalahaon, sorkari cholrangko nigen ine Education Minister parakataha.
Skigiparangni dormaharangko bariatna ba bilsiprako baditaba percent-ko bariatna gita sorkari chol ong·genma ine Gabriel Wahlang-ni minggipin sing·anina aganchakaniko on·angskaengon, 2022 bilsio a·dok sorkari, SSA skulrango skigiparangna agrede Adhoc aro pilak gadangni skigiparangnan dormaharangko bariataha ine Sangma parakataha.