SHILLONG: Meghalaya a·doko load shedding-ko ra·gatengani a·sel ba bijoliko kimitengani a·sel manderang neng·nikanirangko chagrongna nangtokengoba chol ong·teljaengani gimin wachi a·bachengkujaskalde kimitangkunaba gnang ine Power department-ni official saksa parakataha.
Da·ororo bijoliko pringo kontagni aro attamo kontagni dake kimitrongengani a·selan manderang aro mongsongbate poraienggipa chatro chatrirang neng·nikanirangko chagrongna nangtokengahachim ine nikna man·a.
Iani bidingo kobor ra·timgiparangna talataniko on·angengon, Umiam dam-o chirang komiahani gimin MePDCL, bijoliko kimitna nangao ga·aktelenga ine Power department-ni official saksa parakataha.
ONGC Tripura Power Company-ni unit ge·sako chipe donengani a·sel a·dokna bijoliko on·anio chu·ongjaenga ineba ua parakataha.
“Uni gimin chirang chu·onga gita gapkujaskal bijoliko kimitangkunaba gnang aro mikkarang wachakatahaosa chinga bijoli kimitaniko dontongna man·gen,” ine official parakataha.
Manderang neng·nikanirangko man·na nangjana gita man·a dipet bijoli kimitani somoiko bakkandikatna jotton ka·enga ineba Power department-ni official aganaha.
Pangna bilside MePDCL, bijoliko kimitaniko March jani a·bachengachibaraon a·bachengrongna nangachim ine janapatengon, ia bilside adita salrangna mikkarang waangahani gimin load shedding-ko ja·manchake ra·gatna man·aha ine official parakataha.
“Da·o March bon·angachibarasa chinga bijoli kimitaniko a·bachengaha,” ine ua aganaha.
NEEPCO aro gipin bijoli company-rangna MeECL, grorangko chotna man·aha ineba Power department-ni official parakataha.
Meghalaya a·doko nangani kri bijoliko man·jaengani gimin somoi gita kimite watna nangenga ine adita salrangna skangsan a·dokni Chief Minister Conrad K Sangma-ba parakatahachim.
Ia bilside obostarang namkalenga ine janapatengon, ia bilside February ja aro March a·bachengachibarade bijoliko kimitna nangjahachim ine Chief Minister parakataha.