TURA: Re·anggipa 2022 bilsio, February jaoni April jaona Meghalaya a·dokona re·bae jagittamna am·sandianirangko dakanio, rokom gittam bilgipa guangrangko India a·songni salgipeng joloni am·sandigipa dolsa manderang man·aha.
Salgipeng joloni Meghalaya a·dokona re·bae am·sandigipa manderangara, Kerala a·dokni Irinjalakuda-o donggipa Christ College-o Thar Desert Spiders-rangni gimin Ph.D-ko dakenggipa Rishikesh Tripathi, Professor-ni kamko ka·enggipa Dr Ambalaparambil V Sudhikumar aro Northeast India baksana Western Ghats-ni guangrangko am·sandienggipa Biologist Gautam Kadam ong·achim.
Gautam Kadam-ni kobor ra·timgiparangna parakatani gitade, ia rokom gittam bilna man·gipa guangrangoni rokom gnikode uamang South Garo Hills-oniko man·aha aro rokomsakode South West Khasi Hills a·jaoniko man·aha.
Meghalaya a·doko man·gipa ia gital rokomni guangrangoni rokomsakode uamang A·chik matgrik Pa Togan Nengminja Sangma-ni bimingko man·chape, chong·motan ‘Habrocestum togansangmai’ ine mingaha.
Ia gital rokomni guangko uamang, South West Khasi Hills a·jaoniko man·aha aro ian South West Khasi Hills aro South Garo Hills a·jani chiringrango dongbata ine am·sandigipa manderang aganaha. Spider genus ba guangkoba uamang SWKH a·jani Nongnah songoniko man·aha.
Indake ong·engon, bilna man·gipa guangni gipin rokomkoba uamang South Garo Hills a·jani Eman Asakgre songoniko man·aha aro ia guangko uamang ‘Habrocestum emanasakgrensis’ ine mingskaaha. Minggipin ba gittamgipa rokomni guangko uamang, South Garo Hills a·jani Imilchang Dareoniko man·skaaha aro ia guangko uamang ‘Habrocestum imilchang’ ine mingaha. Ia rokomgni bilgipa guangrangko South Garo Hills a·jaosan nikna man·aia ineba am·sandigipa manderang parakataha.