SHILLONG: Batanggimin bilsi 2017-o bilsi chu·sokkugija me·chikko kal·akani gimin bilsi 25-na pattoko donata man·gipa gitcham MLA Julius Kitbok Dorphang-ni uni sastiko komiatna mol·molaniko Meghalaya High Court, ra·chakna jechakataha.
Mni Butbar salo Division Bench, Dorphang-ni mol·molaniko jechakate, special court-ni bilsi 25-na pattoko donata sastiko ra·bina man·jawa ine aganataha.
Court-ni parakani gita, Umiam-o a·sel ong·mitingo ba me·chikko kal·akani somoio dos dakgipa bilsi 52 gapahachim, indake uni bilsiko nigriken trial court-na una bilsi 25 pattoko donata sastiko on·aha.
“Duko ga·akgipa me·chik aro uni nokdangna baditan duk-neng·nikanirang sokaha, iako duko ga·akgipa nokdangsan u·ina man·a, uni gimin dos dakgipako bilsi 25-na pattoko donata baksa trial court, dos dakgipako lak 15 tangka dai gamataha.
Uandake a·dok, duko ga·akgipa me·chikni bilsi 25 gapkuja dipetna uko nirokanggen ine court, janapate, dai gamna nanggipa tangkako gama ong·ode duko ga·akgipa me·chikna lak 20 tangkako gamna nangao ga·aka.
“Minggipin a·dok , duko ga·akgipa me·chikna lak 5 tangkako gamanggen, una agreba dos dakgipani dai gamgipaoniko lak 15 tangkako man·gen. Dos dakgipa dai gamgija bilsi bonga baridape pattoko dongangkua ong·ode, a·doksa lak 15 tangkako gamna nanggen. Uandake a·dok, duko ga·akgipa me·chikni sanna bannani chu·gimik korosrangko on·na nanggen ineba court aganangaha.
