SHILLONG: Meghalaya a·doko niam gri koela bikotani aro salruraaniko champenganio kamrangko name ka·jahani gimin CISF-ni dormaharangko on·skana gita man·a ong·ode police, minister-rang aro nangchakegipa department official-rangni dormaharangko kattiskachina raiko on·china gita Hynniewtrep Youth Council (HYC), Meghalaya High Court-ko didiataha.
“Meghalaya a·doko niam gri koela badinganiko nirokna CISF re·bagenchimode, uamangni dormaharangko on·na man·na gita police, minister-rang aro nangchakegipa department-rangni dormaharangko kattiskachina gita raiko on·china chinga High Court-ko mol·molenga,” ine Bristibar salo, HYC-ni president Robert Kharjahrin parakataha.
“Ian ong·na amgenchimode, CISF-na dormaharangko on·anio ramram manderang maming neng·nikanirangko man·jana gita nangchakegipa department official-rangni dormaharangko kattiskachina gita raiko on·china chinga High Court-ko mol·molenga,” ine Kharjahrin parakataha.
HYC president-ni parakatani gitade, High Court-ni ge·etani gita a·doko niam gri koela badinganiko nirokna gita CISF-ko rimbagenchimode CISF-na dormaharangko on·anio bang·bea tangka paisarang koros ong·gen aro CISF-ko rimbaskajagenchimoba bang·bea kajinarangko gimaatangkuna nangao ga·akaigenchim.
A·doko niam gri koela bikotani aro salruraani dongja ine sorkarini a·kanggipani gimin janapatengon, a·doko niam gri koela bikotani aro salruragipani bidingo Meghalaya High Court-san ong·aigija a·dokni manderangba sorkario bebera·na man·jaha ine Kharjahrin parakataha.
“Uni gimin a·dok sorkari, kachariko aro a·doko songdongenggipa manderangko bebera·atna nangnikenga ong·ode kamchisa mesokna nanga,” ine ua aganaha.
A·doko niam gri koela bikotani aro salruraani dongja ine sorkari a·kangenga ong·ode batanggimin bilsi bonganiko CBI-chi sandirokaniko dakatchina ineba HYC-ni president, a·dok sorkariko ra·biataha.