SHILLONG: Meghalaya a·doko COVID-19 man·giparang sak 13 gaptaiahani gimin mikkang salrango COVID man·giparang batangkunaba gnang ine Sukrobar salo, a·dokni Health Secretary Ram Kumar parakataha.
Health official-ni parakatani gitade, a·doko COVID-19 man·gipa batrorobataiengoba sajinmani giproroaniko warachakna gita a·dok sorkari namen tarisamsoaha.
Koborko on·ani gitade, Sukrobar salo sakgittam manderang COVID-19 man·daptaiaha aro sakgni nampilskana man·ahachim.
A·doko COVID man·gipa manderang batrorobataiengani gimin janapatengon, da·o dipet COVID man·gipa manderangoni darangkoba hospital-o dona dongkuja ine Kumar parakataha.
COVID man·gipa manderangko nirok sandina gita a·dokni hospital-rango kamrangko a·bachengpiltaina nanggnok ineba Health official parakataha.
COVID-19-ko warachakna gita manderangna niamrangko ra·gate on·na skangba a·dok sorkari, obostarangko nipilchenggen ineba health official parakataha.