TURA: Garo Hills-o niam gri bol palsrukanirangko champengna kamrangko ka·engon, batanggimin konta 24-ni gisepon Forest department-o kam ka·enggipa manderang, dingtang dingtang biaprangoniko, niam gri bol salangenggipa gari bolbriko rim·na man·aha ine kobor on·aha.
Koborko on·ani gitade, Garo Hills-o niam gri bol palsrukanirang batroroengani gimin niam gri bol salanirangko Forest department-o kam ka·enggipa manderang bilakbate nirok sandianirangko dakna a·bachengaha aro uandaken batanggimin konta 24-ni gisepo North Garo Hills a·jani Dainadubi aro East Garo Hills a·jani Darugre, Simsanggre aro Songsak Forest staff-rang, niam gri bol salenggipa garirangko rim·na man·aha.
Niam gri bol palsrukanirang batroroengani a·sel buring bolgrimrang porongrong ong·roroangengahani gimin iandake bol palsrukanirangko champengna gita Meghalaya Forest Regulation (Amendment) Act 2021-ni ning·o dos dakgipa manderangna sastirangkoba bariataha ine Forest official-rang parakataha.
