TURA: East Garo Hills a·jani Deputy Commissioner (DC) office-o atchiani, siani, caste aro uandakgipa certificate-rangko tarina nangenggipa manderang dingtang dingtang neng·nikanirangko chagrongna nangtokenga ine A·chik Organisation for Social Welfare (AOSW) matnangatenba, iani bidingo East Garo Hills a·jani Deputy Commissioner-na sedoataha.
AOSW-ni general secretary Premiar N Sangma-ni parakatani gitade, East Garo Hills a·jani DC office-ona dingtang dingtang biaprangoni manderang, siani, atchiani, caste aro uandakgipa certificate-rangko tarina re·batokengon, ia certificate-rangko tarichakgipa office-ni me·chik saksa, manderangko kragija dake aro ka·saninggija dakgipa kattarangchi aganrongani a·sel certificate-rangko tarina re·baenggipa manderang neng·nikanirangko chagrongna nangrongenga.
“Certificate-rangko tarina re·baenggipa manderang mitamrangde songadam nokadamrangoniba re·baenga aro uamangoni mitamde bano maiko sena nanga aro maiko dakna nanga pilakkode ma·sitokpaja indiba ia office-o asongenggipa me·chik, uamangna dakchake on·ani pal batesa raka kattarangchi saie manenge watenga ine chingna kobor on·aha. Manderangna dakchake on·china gitasa uamangko kamo rakkiaha indide maikai uamang iandake manderangko jakkalna man·a?” ine AOSW sing·doataha.
Williamnagar DC office-o birth certificate-rangko tariani form-rang chu·ongjaengani a·selba certificate-rangko tarina re·baenggipa manderang neng·nikanirangko chagrongna nangtokenga ineba AOSW-ni general secretary matnangataha.
Premiar N Sangma-ni parakatani gitade, East Garo Hills a·ja gimikniko Williamnagar DC office-mangmangosan atchiani aro siani certificate-rangko tarie on·enga aro mitam manderangde chel·begipa biaprangoni an·tangtangni certificate-rangko tarina gita ia DC office-ona re·batokengachim. Indake ong·genchimoba, ia office-o bang·a somoirangon certificate-rangko tarina gita form-rangko man·jae manderang neng·nikanirangko chagrongna nangtokenga ine AOSW-ni general secretary parakataha.
Rongjeng jolni manderang birth certificate-ko tarina gita police verification-ko nangengani giminba AOSW sing·doataha.
“Rongjeng-ba East Garo Hills a·jani ning·o donggipa biapan ong·a indide maini gimin Rongjeng jolo songdongenggipa manderangna birth certificate-ko tarina gita police verification-ko nangatskaenga? Chinga scheduled area ning·o donggipa manderangde A·king Nokmani ning·o donggiparangsa ong·e pilak kamon Nokmani soi ba NOC-kosa nangaia aro Nokmani soi ba NOC gride darangba maming kamrangko ka·na man·ja,” ine AOSW-ni general secretary, Rongjeng jolo songdongenggipa manderangna birth certificate-ko tarina gita police verification-ko nangatengani gimin sing·doataha.