SHILLONG: A·dokni mongsonggipa Eid Gagh-rango Ed al Fitr pringni bi·anio bang·a hajal bebe ra·giparang uamangni namaz-ko minganganio dal·bea chu·sokaniko man·angaha.
Mosque-ni a·palrango Eid Gah-ona dakanggipa ramarango chonbegipa chingbegipa triangular nisanrangko songangaha, aro rama rikamrango chakgijagipa pala simanirangko manderangni breanganiniko nikna man·aha.
Bi·giparangna cha·ani palgiparang jekai sewai (mini noodle ba mini vermicelli) aro matchu be·en palgipa dokanrangni namgipa badingchiwalanirangko dakangna man·aha.
Manderang bi·ani ja·man joljolan saksa sakgipinko gipakgrike saksa sakgipina nama skaniko on·angaha aro uni ja·man uamang nokdangni aro ripengskarangni nokrangona wenange ku·chi mittapgipa cha·anirangko uamangna sachie on·anga.
“Eid-al-Fitr manianio sakantina gisik ka·tong gimiko nama skaniko on·atenga. Ia dingtangmanchagipa manianio an·chingni songsalrangni gisepo bilakgipa tom·tomani aro ku·mong nangrimani ong·angchina,” ine Chief Minister Conrad K Sangma tweet-o seataha.
“Muslim-rangoni bebe ra·gipa sakantina aro angni pilak ripengrangna Eid-ni nama skani ong·china, ia manianio bilakgipa ka·saani aro namgipa gisik silroroanina aro tom·tomanina angni gisik ka·tongoni nama skaniko on·ataha, kusian katchaan gapgipa aro pattian man·gipa maniani ong·china,” ine AITC parliamentary party-ni dilgipa, Dr Mukul Sangma-ba tweet-o seataha.
