SHILLONG: Meghalaya a·doko Uniform Civil Code (UCC)-ko ra·gatna gita ma·mong sorkarini miksongenganiko a·dokni damgittam Autonomous District Council (ADC)-rang, chong·motan KHADC, GHADC aro JHADC-rang jegalatenba, iani bidingo resolution-ko ra·na tik ka·angaha.
Sombar salo, ia damgittam ADC-ni chief executive membor (CEM)-rang, Shillong-o tom·aniko ong·atangenba, a·doko aro mongsongbate a·dokni Sixth Scheduled a·jarango Uniform Civil Code ra·gatna miksonganiko jegalangtokaha.
ADC-rangni tom·a matchotani ja·mano kobor ra·timgipa manderangna talataniko on·angengon, Sixth Schedule a·jao Uniform Civil Code ra·gatna miksongenganiko jegalna gita apsan nangrime resolution-ko ra·na ia tom·anio tik ka·e donangaha ine KHADC-ni CEM Titosstarwell Chyne parakataha.
“Sixth Schedule a·jao UCC ra·gataniko jegalna gita chinga damgittam ADC-rang apsan resolution-ko ra·gen aro an·tangtangni gitaba resolution-ko ra·gen,” ine Chyne aganaha.
Ma·mong sorkarini UCC Bill-ko ra·bana miksongenggipani gimin ia tom·anio chanchirimaha ine talataniko on·angengon, “Sixth Schedule a·jao Uniform Civil Code-ko ra·gataniara ADC-rangni bil aro chalaiani bewalrango nangchakeaniko ra·bagen aro ian jatni daka rikanioba nangchakeniko ra·bagen,” ine KHADC-ni CEM parakataha.
Iani bidingo special session-ko ong·atgenma ine sing·on, iani bidingo uamang ta·raken ja·kuko de·na nangnikengani gimin iani bidingo special session-ko mikkang jaon ong·atnaba gnang ine Chyne parakataha.
“Uniform Civil Code-ko ra·gataniara an·chingni bia ka·ani bewal aro bang·a daka rikanirango nangchakeani dongna siengani gimin bang·a neng·nikanirang dongenga. An·chingni Sixth Schedule a·jao an·chingni daka rikani, bia ka·ani, bebera·ani, olakkiani aro pilakan gipinrang baksa namen dingtanggrika indiba an·chingo ia UCC-ko ra·gatgenchimode an·chingoba gipinrango gitan bia ka·ani bewalrangko ja·rikna nanggnok. Uni gimin Scheduled Tribe ong·e an·chingni a·doknade ia UCC-ara kraani ong·jaenga,” ine Chyne aganaha.
KHADC CEM-ni parakatani gitade, ia damgittam ADC-rango resolution-ko ra·ahaode a·dok sorkariba apsan ramaon re·na nangao ga·akgen.
“Citizenship Amendment Act-kode Sixth Schedule a·jarango watchanggalahani gimin Uniform Civil Code-koba apsan daken Sixth Schedule a·jarangode watna nanga. Uni gimin Sixth Schedule a·jao Uniform Civil Code ra·gatanikode chinga raken jegalangkugen,” ine Chyne parakataha.