SHILLONG: Meghalaya a·doko All India Trinamool Congress (AITC)-ni MLA sakbonga dongani gimin saksa sakgnichide Bharatiya Janata Party (BJP) baksa bakrimani bidingo chanchina man·jawa aro bakrimna nangode MLA sakbonga meliesa bakrimna nanggen ine Mongolbar salo, a·dokni Cabinet Minister aro Meghalaya BJP-ni dilgipa AL Hek parakataha.
“AITC-o MLA sakbonga dongani gimin saksa sakgni BJP baksa bakrimaigenchim ong·ode anti-defection law-ko pe·ani gita ong·gen ine uamang apsan chanchirimna tik ka·aha. Iani bidingo anga AITC-ni president Charles Pyngrope aro Parliamentary Party-ni dilgipa Mukul Sangma baksa agangrikaha aro uamangba iakon dakna nangnikenga,” ine Hek aganaha.
AITC MLA-rangni aganchakani mai ong·gen, ukode ja·manosa ma·siaignok ineba Hek parakataha.
“Chinga da·o uamangni aganchakaniko sengengkua aro uni ja·mande chinga nanga gita ja·kurangko de·anggnok,” ine ua aganaha.
Ua an·tangde BJP-ni pal, AITC baksa agangrikenggipa ong·ja indiba uamangni gisepo ramram golpoe roanisan ong·aia ineba BJP MLA parakataha.
Songbad kingsao parakani gitade, re·anggipa February jao ong·atanggipa Assembly election-o chu·sokgipa ong·jahani gimin AITC-ni sakbri MLA-rangde BJP-o napskana tik ka·ahachim aro ia MLA-rangko, a·dokni gitcham chief minister aro AITC-ni MLA Dr Mukul Sangma an·tangan dakdilengachim.
Indake ong·genchimoba, AITC MLA-rangko nokchakjachina gita NPP-ni dilgipa aro a·dokni Chief Minister Conrad K Sangma ku·rang on·atani ja·man, AITC-ni MLA-rangko Assam-ni Chief Minister aro BJP-ni dilgipa Himanta Biswa Sarma champengatskaahachim.
AITC-ni MLA-rang, BJP-o napna miksonganirang donga inako Meghalaya AITC-ni president Charles Pyngrope aro parliamentary party-ni dilgipa Mukul Sangma-de jegalatskaahachim ine nikna man·a.
Indake ong·engon, re·baenggipa 2024 bilsini Lok Sabha election-o BJP, Shillong aro Tura parliamentary constituency damgnion susaanggen ineba Hek parakataha.