SHILLONG: Re·baenggipa April 29 tarikoni May 2 tarikona Meghalaya sorkarini Tourism Department, Umiam Sailing Club baksa nangrime, Northeast Regatta-ko Umiam Watersports Complex-o ong·atna tarisamsoengaha ine kobor on·aha.
Ia Northeast Regatta-ko April-ni 29 tariko, a·dokni Tourism Minister Paul Lyngdoh, a·bachengate on·anggen aro uni ja·man a·dokni Chief Minister Conrad K Sangma-ba April-ni 30 tariko bakko ra·anggen ineba kobor on·aha.
Ia program-ko ong·atanio India a·songni dingtang dingtang dam 10 a·dokrangoni, dol 12 club-rangoni sak 80 manderang bakko ra·anggen aro Indian Army baksana Naval Services-ni dolrangba, UDAY FOUNDATION TEAM (India-ni ge·samangmang ring chogipa NGO) baksa bak ra·anggen.
Ia boat regatta-ko ong·atani miksonganiara a·doko water sports ba chio kal·susaanirangko tang·doatna, tourism-ko bariatna aro ring choani biap ine world sailing map-o nakatatna, medalist-rangko nakatatna, aro workshop-rango bak ra·atna didie chadamberangna janggi tangani cholrangko bikote uamangko bil gnangatanian ong·enga.
Ia manianio ring chosusaani baksa doka-dam·ani aro jatni dakbewalrangko maniani, ong·telaigipa nitogipa biaprangona re·rame niani, cha·ani-ringani aro gipin bosturangko palani, ring chogiparang aro rona re·bagiparangna tour package-rang, paintball, camping sports aro Umiam-ona river cruise boat-rangko ra·baanian ong·a.
April 29 aro 30 tarikrango biaptangni aro gipin biaprangoni mingsinggipa git ring·gipa, dokgipa-dam·gipa dolrangni concert-ko nikangna gita man·gen.
Skanggipa salo K-Pop artiste Kim Woojin skanggipa ring·aniko dakanggen aro gnigipa salo Delhi-oni dokgipa-dam·gipa dol Twin Strings a·bachengatskagen. Ia concert-o gipin ga·sugipa ring·gipa dolrangba donggen jekai Lynx, Ricaa Stella, Banrap, Rum & Monkeys, LB3, Young Natee, Larger Than 90, aro DJ Favian.
Ia manianina ticket-na bimung segataniko April 24, attam 5 bajioni a·bachengataha, uni gimin da·o uarangko ra·na gita man·gnok.