SHILLONG: Kenbegnigipa Malaria sabisiko warachakanio manderangni dakna nanggnirangko u·iatanichi ia sabisiko gimaatsrangchina gita Bristibar salo, Meghalaya a·dokni Health Minister Ampareen Lyngdoh didiangaha.
Bristibar salo, World Malaria Day-ko maniani bak gita program-ko ong·atanio a·dokni Health Minister, ia kattarangko aganaha.
2015 bilsioni da·alona kingkingan Malaria sabisi man·aniko komiatna gita Health department, rakbee kamrangko ka·aha ineba ua aganaha.
2030 bilsini gisepon malaria sabisiko bon·atsrangna ku·mikchetanikoba ua ia tom·anio bak ra·giparangna gisik ra·ataniko on·angtaiaha.
Batanggimin adita bilsirangni gisepo malaria sabisini a·sel a·doko sakchet manderang siaha ine janapatengon, mikkangchi malaria sabisini a·sel mande siani batangjachina ine Lyngdoh parakataha.
Malaria sabisiko warachakanio manderangni bakrimaniko on·na nangani gimin janapangengon, sabisiko warachakanio manderang an·tangtangni daitorangna ka·jagenchimode dingtanganiko nikna man·jawa ine Health Minister parakataha.
Malaria sabisiko gimaatani cholrangni gimin janapatengon, nalarangko, chiakolrangko bangbang donjachina aro skatang jabolrangko galjachina gita Lyngdoh ku·pattianiko on·angaha.
Malaria-ko warachakanio dingtang dingtang department-rang bakrime kamko ka·na nanga ine janapatskaengon, “Malaria sabisiko warachakanio PWD, Urban Affairs aro uandakgipa department-rangni gisepo bakrime kamko ka·na gita dakmesokanirangko on·na nangenga,” ine Lyngdoh aganaha.
Meghalaya a·doko malaria man·e siani 2015 bilsio sak 40-oni re·anggipa bilsio sakgittamona tang·onangahani gimin ia sabisiko bon·atsrangna gita a·dok sorkari da·o bilakbate kamrangko ka·engahachim.
1997 bilsioni 2019 bilsiona official-rangni see rakkianiko parakani gitade, 2007 bilsion malaria man·e sigiparang sak 237 ong·e bang·batgipa ong·ahachim aro ianoni sak 117-de West Garo Hills a·jamangmangni ong·achim.
Malaria-ni bidingo manderangna u·iatanichi sabisiko gimaatsrangchina Ampareen didia
Date:
Share post:
