SHILLONG: Khasi-Jaintia Hills a·jarang baksa bilsi 50 batpile apsan dongani ja·man Garo Hills-o songdongenggipa manderangni dingtang a·dokna dabianio aro Tura-ko Winter/Second Capital songchina dabianio maming ong·gijani dongja ine Robibar salo, United Democratic Party (UDP)-ni dilgipa Bindo Mathew Lanong parakataha.
Lanong-ni parakatani gitade, Jammu & Kashmir a·doko ja·rika gita Meghalaya a·dokoba sin·karini somoio skotong songjinmako Garo Hills-ona apjitskachina dabianiara maming gualani dongjachim.
Indake ong·genchimoba, Meghalaya a·dokara indinan tangka paisani gita neng·nikanirangko man·enggipa a·dok ong·ani gimin Tura-ko Winter Capital songanio, kam ka·giparangko aro dingtang dingtang nanganirangko apjitaniosa neng·nikanirangko man·gen ine Lanong, talataniko on·angaha.
Garo Hills-o dam 24 Assembly constituency-rang dongani gimin apsan dakgipa cholrangko man·na kraa ine janapatskaengon, Captain WA Sangma aro gipin dilgiparangni dilanichi ua somoio Khasi aro Pnar-rangba A·chikrang baksa apsan nangrimen Assam-oni ma·ekna gita dakgrikaha aro bon·kamao ‘Assam Reorganisation (Meghalaya) Act 1969’-ko Parliament pass ka·aha ine Lanong parakataha.
Hajalni hajal A·chikrang da·o Khasi Hills a·jao, mongsongbate West Khasi Hills aro Ri Bhoi a·jao songdongkamgiparang ong·aha ineba ua gisik ra·ataniko on·angskaaha.