TURA: Ia sal somoirango internet aro social media-rang gita manderangko cha·bokanirang batroroengani gimin manderangko mikrakchina aro iandakgipa kamko bon·atna pilakkon bakrime kam ka·china gita Tura-ni MDC Bernard N Marak didiataha.
Marak-ni parakatani gitade, iandake internet gita cha·boke ra·enggipa manderang, ukoba cha·bokna jotton ka·ahachim indiba bakan ua iandakgipa manderangni phone nombor aro bank detail-rang baksa Cyber Crime cell-na u·iate, Tura-o FIR-koba ka·aha.
Internet gita cha·boke ra·gipa manderangni dakrongbewal kamni bidingo talataniko on·angengon, “Skanggipa me·chik saksa, an·tangni bi·sa saengani gimin ICU-o donenga ine pa·sike tangkarangko dakchakatchina phone gita mol·molatgen. A·bachengo uamang gong 10,000/-ko on·atchina bi·atgen indiba indita tangkarangko na·a on·atna jechakon, uamang jegita man·a on·atchina mol·molatgen. Tangka paisarangko on·atani ja·mande na·a ma·sina man·gijagipa nombor-rangoniko video call-rang man·sogen aro ia video call-rango uamang an·tangtangni mikkangrangkode mesokgija video-ko chipe ra·gen. Ja·mano uamang ia video-ko taridape na·a nie ra·engkan ine watatchenggen aro uni ja·mande uamang nang·niko tangka dabie ra·na a·bachenggnok. Uno na·a tangka on·na jechakode aro uamangni nombor-rangko block ka·ode saobarangsa, an·tangtangni Cyber cell-oni ine tol·e nang·ko ka·mikkenatna a·bachenggnok,” ine Tura-ni MDC parakatenba, iandakgipa obostarangko chagrongna nanggenchimode ta·raken uamangni nombor-rang baksa Police-rangna u·iate FIR ka·na nanga ine didiataha.