Niamo pangchake a·doko koela bikotna chol ong·gnok: CM

SHILLONG: Meghalaya a·doko koela bikotgipa mande sakbrini mining lease-rangko India sorkari ra·chakmanahani gimin a·doko niam gita koela bikotaniko a·bachengna chol ong·gnok ine Mongolbar salo, Central Mine Planning & Design Institute Limited (CMPDI), Forest aro Mining department-ni official-rang baksa tom·e chanchirimani ja·man a·dokni Chief Minister Conrad K Sangma parakataha.
Koela a·damrangko man·pilna gita plan-rangko tarina ia tom·aniko ong·atangaha ineba tom·a matchotani ja·man Chief Minister parakataha.
“A·ningni dal·gipa ba chongipa bosturang ong·genchimoba chinga kamko ka·enga ine na·simang ma·sia aro koela a·kolrangko ra·pilna gita chingo tangka paisarang dongani gimin ia kamchi chinga kamrangko a·bachengatenga. Niamo pangchake koelarangko bikotna gita chinga dingtang dingtang agency-rang baksa kamko ka·enga indiba da·o kamni gimin ma·sibatsranggipa CMPDI baksa chinga da·alo che·em che·em chanchirimaha aro koela a·kolrangko man·piltaina gita chinga kamrangko ka·chakatengaha,” ine Sangma aganaha.
Chief Minister-ni parakatani gitade, niamo pangchake koela bikotaniko a·bachengatna champengatako man·enggipa kamara mining lease ba koela bikotani licence-rangko ra·anian ong·engachim indiba antisamangna skangan India sorkari, a·doko koela bikotenggipa mande sakbrina licence-rangko on·na gita ra·chakmanaha.
“Uni gimin an·ching da·o rakbatsranggipa kamkon badebana man·aha aro an·ching niamo pangchake koela bikotaniko a·bachengna cholrang ong·engaha. Da·o chinga public hearing baksana forest clearance aro mining plan-ko ra·chakna nangkuenga indiba ia kamrangkode chinga sal 30-oni sal 45-mangni gisepon matchotna ka·dongenga,” ine Chief Minister parakataha.