PDF MLA-rang Sonibar salo NPP-o napgen: Conrad

SHILLONG: People’s Democratic Front (PDF)-ni MLA-rang, re·baenggipa May-ni 6 tarik Sonibar salo, National People’s Party (NPP)-o napgen ine a·dokni Chief Minister aro NPP-ni national president Conrad K Sangma parakataha.
Da·o dipet PDF-o MLA sakgni donga aro NPP-o sak 26 MLA-rang dongahani gimin PDF-ni MLA sakgniba NPP-o napahaode gimik sak 28 MLA-rang ong·e, doltangari sorkariko rikna gita sakgittam MLA-kosan nangaignokchim.
NPP-o napna sienggipa PDF-ni MLA sakgniara, Mawkynrew-ni MLA Banteidor Lyngdoh aro Sohra-ni MLA Gavin M Mylliem ong·a.
Re·baenggipa May-ni 10 tariko ong·atenggipa Sohiong Assembly election-na a·dokni Chief Minister aro NPP-ni national president Conrad Sangma, NPP-ni candidate Samlin Malngiang-na campaign ka·engmiting somoio iako parakataha.
Mongolbar attamo a·dokni Chief Minister, Sohiong constituency-ni Lawmei, Nongpathaw aro Kreit songrango campaign ka·angahachim.
Ia tom·anirango ua jinmana aganprakangengon, Mongolbar salo PDF aro NPP-ni dilgiparang tom·e chanchirimangaha aro PDF-ni MLA-rang baksana dilgiparangba NPP baksa bakrimna tik ka·angaha ine Sangma parakataha.
“PDF-ni MLA-rang, May jani 6 tariko NPP-o napanggnok,” ine NPP-ni national president parakataha.
NPP baksa bakrimaniko PDF-ni mitam dilgiparangde namnikjae jegaltokengachim ine nikna man·a.