SHILLONG: Re·baenggipa 2024 bilsio ong·atna sienggipa Lok Sabha election-oba changgittamna Shillong-ni Lok Sabha MP ong·enggipa Vincent H Pala, Shillong Lok Sabha constituency-o Congress candidate ong·e susaangtaigen ine u·iataha.
Gipin doloni susana miksongenga ine manderangni jangbingbanganiko jegalatengon, “Anga cheoba, amako man·oba, Congress dolni candidate ong·en susaangtaigen,” ine Pala parakataha.
Pala-ni aganani gitade, ua NPP-ni national president Conrad K Sangma, NPP-ni state president WR Kharlukhi aro BJP-ni state president Ernest Mawrie baksaba meliani giminsa manderang uko re·baenggipa bilsini Lok Sabha election-o dingtang doloni susana miksongenga ine chanchichiptokengachim.
Politics-o napna skangan ua dingtang dingtang political dolrangni miksongani aro niamrangko name nichengaha ine janapatengon, Congress dolni miksonganirangan una nambatgipa ong·a ine nikahani giminsa ua Congress dolo napaha aro da·o gipin dolrango nape election-o susaani katta dongjaha ine Meghalaya Pradesh Congress Committee (MPCC)-ni president Pala parakataha.
Karnataka Assembly election-ni result-rangan mikkang bilsio ong·na sienggipa Lok Sabha election-o dingtang dingtang dolrangni rasiko mesokna sienga ineba Pala aganaha.
“BJP-chi sason ka·enggipa Karnataka a·doko Congress chegenchimode ian BJP-ko manderang jegalengaha ine mesokani ong·gen. Ia election-o Congress dol, bang·gija vote-rangchi amako man·genchimoba ian BJP-ni bon·anganiko mesokani ong·gen,” ine ua aganaha.
May-ni 10 tariko ong·atenggipa Sohiong Assembly election-ni bidingo janapatskaengon, ia election-na Congress rakbee kamrangko ka·soengaha indiba da·o dipet dal·gipa tom·bimonganirangko ong·atna man·kujaenga ine MPCC-ni president parakataha.