SHILLONG: Manipur a·dokni Regional Institute of Medical Sciences (RIMS)-o poraienggipa sak 172 chatro chatrirangoni sak 27-kosan a·doktangona rimbapilna man·engkuani gimin Khasi Students Union (KSU) suk ong·gijaniko parakatenba, chatro chatrirang pilakkon tom·tomao a·doktangona rimongkatbachina gita a·dok sorkariko didiataha.
Iani bidingo kobor ra·timgipa manderang baksa agangrikengon, Imphal songjinmani RIMS-o poraienggipa sak 172 chatro chatrirang dongachim indiba da·o dipet sak 27-kosan a·doktangona rimbapilna man·kuenga aro sak 145-de uamangni poraienggipa biapon dongtokna nangkuenga ine KSU-ni general secretary Donald V Thabah parakataha.
“Uni gimin chatro chatrirang pilakkon rimonkatbachina chinga a·dok sorkario dabienga aro ia dabianiko knachakjagenchimode sorkarini kosako rakgipa ja·kurangko de·anggen,” ine KSU-ni general secretary aganaha.
Thabah-ni parakatani gitade, Manipur a·doko so·sojengjeng ong·anirang batroroengon, ua biapo poraienggipa a·dokni chatro chatrirang, chadrapako man·na kenchipchipe dongna nangtokengachim.
Sikkim aro Tripura a·dokrangde changsanon chatro chatrirangko a·doktangtangona rimangpilna man·ahaon maini gimin Meghalaya sorkaride a·doktangni chatro chatrirangko changsano rimbapilna man·jaha ineba ua sing·doataha.
Chatro chatrirangko bak dake rimbana a·dok sorkarini kam ka·aniara kam choligijaniko mesokani ong·enga ineba Thabah matnangataha.
“A·bachengode Civil Aviation Ministry, Imphal airport-ona bilangna gita permission-ko on·jachim indiba chingni kobor man·soani gitade da·o ma·mong sorkari, Imphal airport-ona sildorengrangko bilangna on·aiahachim,” ine KSU-ni general secretary aganaha.
Ua All Manipur Students Union (AMSU) baksaba agangrikaha aro uamang Meghalaya a·dokni chatro chatrirangko naljoke rakkina gita ku·rachakaniko on·ataha ineba KSU-ni general secretary parakataha.
Manipur-o jachange dongenggipa pilakkon rimongkatbachina KSU didia
Date:
Share post:
