TURA: Meghalaya a·doko aro mongsongbate Garo Hills-o baditaba kontarangna load shedding ba bijoliko kimitengani a·sel manderang neng·nikanirangko chagrongna nangtokengahani gimin New Tura Development Forum (NTDF), a·dok sorkariko sing·doataha.
Election-ni somoio load shedding-ko ra·gatna man·jahani gimin da·o ia jarangosa ra·gatskana nangao ga·akengaha ine adita salrangna skang, a·dokni Chief Minister Conrad K Sangma-ni agangipa kattarangna suk ong·gijaniko parakatengon, election-ni somoio maming neng·nikani grian Power department, a·dokna bijoliko on·na man·aha ong·ode da·o maini gimin bijoliko kimitgija on·na man·skajaenga ine NTDF-ni president D Ch Marak sing·doataha.
“Election-ni somoio maming neng·nikani grian bijoliko on·na man·aha ong·ode maini gimin ia sal somoirangora bijoliko kimitna nangskaenga? Da·ororo indita kontarangna bijoliko kimitengani a·sel manderang chaktopilgija ding·anirangko chakna nangenga, refrigerator-rango dongipa cha·ani bosturang nosto ong·e manderang noksan ong·na nangtokenga, chatro chatrirangba poraianirango neng·nikanirangko man·na nangenga aro pilakan kamtangtangko ka·anio neng·nikanirangko chagrongna nangtokenga,” ine Marak parakataha.
Bijoliko kimitanichi kajina gamna nanganiba kominasa nangengachim indiba batasa batroroskaenga ineba NTDF-ni president suk ong·gijaniko parakataha.