U·IATTIMGIPAONI
TURA: Tamil Nadu a·doko kam ka·e cha·na ine rimangako man·gipa South Garo Hills a·jani mande saksa re·anggipa antionin gimaenga ine Association for Democracy & Empowerment (ADE) Gasuapara regional unit-ni president Callyneccan Ch Sangma kobor on·aha.
Koborko on·ani gitade, ia mandeara South Garo Hills a·jani Dimapara jolo donggipa Dangsubil songni Mimu T Sangma minggipa mande ong·achim aro ua May-ni 1 tariko songtangoni Paikan-ona re·angani ja·man attamo uamangni ma·sigijagipa mande saksa uamangko Tamil Nadu a·doko kam ka·e cha·na rimangskaahachim. Tamil Nadu a·dokona sokangani ja·man ua Mosuor songo donggipa Vertex company-o kamko ka·engachim indiba sokangani salgipin attamo, ua night duty matchote pringode uni kam ka·gipa company ning·on ua gimaaha.
“Ia gimagipani obostako unbaksa apsan kam ka·rimgipa mande, jekon a·palchi tela gari re·ange re·bapilede an·tangni ripengko nikejaha aro uamang sakgnion mobile phone-rangba dongjae, ia obostani gimin nokdangni manderangna koborko ta·rake on·ningna man·jaha indiba ja·mano uamang maibakae nokdangni manderangna koborko on·atna man·aha,” ine ADE Gasuapara regional unit-ni president parakataha.
Da·o dipet ia mandeko nikpilani ba man·pilani maming koborrang dongkujaenga ine janapatengon, gimaenggipa mandeni ma·drang, re·anggipa May 9 tariko, Dimapara Infiltration check post-o missing report-ko on·aha ine Sangma parakataha.
Iani bidingo Tamil Nadu a·dokni Chief Minister baksa agangrikate, gimaenggipa mandeko sandina dakchakchina gita ua Meghalaya a·dokni Chief Minister Conrad K Sangma-koba didiataha aro police-rangko ta·raken iako jako ra·e sandiatchina gita ADE Gasuapara regional unit-ni president didiataha.