TURA: Niam gri bol salanina NGO-rangni rim·e on·gipa gariko kamtango simsakjani a·sel jokataha ine Betasing Forest Beat Office-ni forester-ni kosako Zikzak-ni Garoland State Movement Committee (GSMC) aro A·chik Holistic Awakening Movement (AHAM)-ni membor-rang, Mahendraganj Range Forest Office-ni Range Forest Officer-na badi ka·doangaha.
Ia dolgni NGO-rangni parakatani gitade, mitam manderang, niam gri bolrangko Assam-ona salangna jotton ka·enga ine Sonibar salo koborko man·soani ja·man uamang niam gri bol salgipa gariko sandiangon, Sonibar walni 9:30 bajimango Jangnapara song sambao donggipa ramao nombor plate gri bol salangenggipa Mahindra pik-up gari bolsako nikeaha. Ia gariko NGO-ni membor-rang, Meghalaya Forest (Removal of Timber) Regulations Act 1981-o pangchake rim·aha aro iani bidingo Zikzak Outpost-ni police-rangnaba kobor on·ataha.
Adita somoirangni ja·man ua biapona police-rang aro Betasing Forest Beat House-ni forester-ba sokangahani gimin NGO-rang, ia bol salgipa gariko forester-ni jako pakwate on·atahachim.
Indake ong·genchimoba, Robibar pringo ia dolgni NGO-rangni membor-rang, ia gariko nina Betasing Forest Beat House-ona re·angon, ia bol salgipa gariko uamang nikejaha.
“Uni gimin ia niam gri bol salgipa gariko watpilatahani gimin chinga ia forester-ni kosako raken jegalenga aro uni kosako rakgipa ja·kurangko de·china dabienga,” ine Zikzak-ni GSMC aro AHAM dolrang parakataha.
