SHILLONG: Meghalaya a·dokni SSA skulrango skigiparangna March jani dormahako mikkang antini gisepon sorkari watatna ku·rachaka ine Budbar salo Meghalaya SSA Schools Association (MSSASA)-ni president Aristotle Rymbai, a·dokni Education Minister Rakkam A Sangma-ko grongeani ja·man, kobor ra·timgiparangna parakataha.
A·dokni SSA skulrango skienggipa manderang dingtang dingtang neng·nikanirangko chagrongna nangtokengani gimin Budbar salo MSSASA-ni dilgiparang, a·dokni Education Minister-ko gronge agangrikeahachim.
SSA skigiparangna dormaharangko skigiparangni account-rango chipatna gita ja·kurangko de·chakatahani giminba MSSASA-ni president, a·dok sorkariko mittelpilangaha.
“SSA skulrango skigiparangna dormahako skigiparangni account-rango chipatchina gita ru·uta sal somoirangonin chinga dabiengachim aro iako knachakahani gimin chinga a·dokni Education Minister, Deputy Chief Minister Prestone Tynsong aro MDA sorkarikoba mittelpilna ska,” ine Rymbai parakataha.
Rymbai-ni parakatani gitade, skigiparangni account-rango dormaharangko chipatna gita sorkari, re·anggipa jaon ia niamko ra·gataha aro skigiparangna ia 2023 bilsini January ja dipetan dormaharangko skigiparangni account-rango chipatgnok.
SSA-na tangka paisarangko bang·bate chamchina dabienggipani giminba MSSASA-ni dilgiparang, Education Minister baksa agangrikaha ine u·iataha.
“Ia dabianiko chu·sokatna gita ja·kurangko de·chakataha ine Education Minister, da·alo chingna parakataha aro uni aganani gitade, skigiparangni dormaharangko on·anio maming neng·nikanirangko man·jana gita 2022-23 bilsina skanggipa instalment-ko ma·mong sorkari, June jani bon·angachibara ong·jaode July jani skanggipa antion watatgnok,” ine Rymbai parakataha.
SSA skigiparangni dormaharangko on·na gita sorkari, corpus fund-oniko tangka paisarangko ra·aha ineba MSSASA-ni president parakataha.