SHILLONG: Sukrobar salo, pilak political dolrangni tom·aniko ong·ate, roster system-ni bidingo ma·sisretanirangko aro jajrengchakna nanganirangko agan-talate on·ahani gimin Meghalaya a·dokni All India Trinamool Congress (AITC), a·dok sorkariko mittelpilangaha.
“Chingo jajaanirang aro ma·sina nanganirang donggenchimoba da·alo sorkarini talate on·aniko man·e chinga chu·ongnikaniko man·aha aro ia roster system-ko ja·rikanichi an·ching pilaknan namgni ong·enga ong·ode iako ja·rikanian nambatgipa ong·enga. Ia kamo pilak political dolrangkon bak ong·atahani gimin anga an·tangde kusi ong·a,” ine Meghalaya AITC-ni vice president George B Lyngdoh parakataha.
Iani ja·mano jekon sorkari tik ka·genchim, uko political dolrangna mesoke on·angtaigen aro iano pangchake dingtang dingtang dolrang chanchirimtaienba, committee-ko songgen ineba Lyngdoh parakataha.
Ia apsan roster system-kon lekka poraiani a·barangoba jakkalgenma ine sing·anirangan manderangni gisikrango ong·katengachim ine janapatengon, lekka porani biaprangna biapko chamaniode ia roster system-ko jakkaljawa aro ian kamna ra·aniosan ong·aigen ine AITC-ni dilgipa parakataha.
“Dingtang dingtang department-rango donggipa post-rangko nipilna gitasan batanggimin somoirangko nipilani ong·aigen ineba sorkari ku·rachakaha aro chingni nangnikani gitan mikkangchikosa nie kamo ra·anirangkode dakna gita sorkari ku·rachakaha,” ineba Lyngdoh aganaha.
Indake ong·engon, roster system-ko ra·gatanio pilak dolrangkon bak ong·atchina uamang nangnikenga aro ia tom·ani ja·man dingtangmancha committee-ko songe ia committee-o political dol ge·antinin membor-rangkon bak ong·atna gita sorkari ku·rachakaha ine AITC-ni sakgipin dilgipa Zenith Sangma parakatskaaha.