SHILLONG: Voice of the People’s Party (VPP)-ni skanggipao roster system-ko ra·gatkujaskal, pilak department-rangon kam on·aniko dontongchengna nanga ine dabianiko sorkari, chu·sokatna tik ka·ani ja·man da·o VPP-ni dilgiparang, sorkarini kosako okumu chake jingjengatskana manchiani gimin a·dokni Chief Minister Conrad K Sangma, suk ong·gijaniko parakataha.
“VPP-ni nangnikanirangko da·o chinga chu·sokatna aganengon da·o dingtang nangnikaniona re·anganiko angade ong·nikjaha,” ine VPP-ni okumu chake jingjengatna tik ka·gipani bidingo Chief Minister parakataha.
Roster system-ko batanggimin somoirangna ong·gija mikkangchinasa tarina nanga ine a·bachengo VPP-ni dilgiparang dabiani ja·man da·ode, reservation policy-ko gital dake taritaipilchinasa dabiskaengahachim ine nikna man·a.
VPP-ni iandake dabianirangko jegalatengon, “Da·al salni bako pilak political dolrangan re·bae sorkarini kam ka·aniko ma·sienba ra·chakangtokaha. Oe beben kamko ka·anio ra·bianirangde dongaigen indiba chingni ja·rikenggipa ramako aro chingni mesoke on·enggipa kamko pilak political dolrangan namnike ra·chaktokaha,” ine Sangma parakataha.
VPP-ni okumu chake jingjengatna parakatgipa bidingo janapatskaengon, “Ian uamangni manchianisa ong·a indiba an·ching pilakan dilgiparang ong·e a·dokna aro a·dokni manderangni namgninasa chanchina nanga. Badiaba kamrangchide an·ching jatsa jatgipinni gisepo meligrikgijani aro dinggrikanirangkoba ra·bana man·gen. Uni gimin ia pilakkon an·ching name nichengna nangao ga·aka,” ine Chief Minister talataniko on·angaha.
Pilak kamrangode politics-ni gita ong·na nangja indiba a·dokni tom·tomani aro namroro silroroani giminba chanchie kamko ka·na nanga ineba ua aganaha.
Dingtang dingtang political dolna kam ka·enggipa manderangko didiatengon, “An·ching indita bilsirangna apsan songdong a·chaengaha aro an·tangtangni a·dok dongna gita an·chingara namen rasong gnanggiparang ong·a. Batanggimin bilsirangoba an·ching reservation policy gita dakgipa niamrangko ja·riken janggi tangbaaha aro an·ching iandakgipa niamrangko dingtangatanichi mai nangchakeanirangko man·gen, uarangkoba nina nangao ga·akenga,” ine Chief Minister parakataha.