TURA: Tura-ni Dakopgre Post Office-o kam ka·giparang name kam ka·jaengani a·sel manderang neng·nikanirangko chagrongna nangtokenga Federation of Khasi Jaintia Garo People (FKJGP)-ni president Pritam Arengh, Tura Head Office-ni Head Post Master-na badi ka·e sedoataha.
FKJGP Garo Hills Zone-ni president Pritam Arengh-ni Head Post Master-na badi ka·e sedoatanio parakatani gitade, re·anggipa May 8 aro 10 tarikni gisepo, Dakopgre Post Office-oni phone ka·atenba, uni parcel-ko ra·echina aganataha. Uni parcel-ko maini gimin uni nokona ra·ange on·jaenga ine ua sing·aton, Dakopgre Post Office-o kam ka·gipa postman dongja ine una aganchakataha.
Uni parcel-ko uni nokona ra·ange on·jani gimin ua an·tangan May-ni 15 tariko Dakopgre Post Office-ona re·ange an·tangni parcel-ko sandieon, ua parcel-ko ra·eningjani gimin watatpilaha ine post office-o kam ka·giparang una aganchakaha. Parcel-ko uo sing·chenggija maina watatpilaha ine ua kam ka·giparango sing·on, post office-o kam ka·giparang mamingkoba aganchakna man·jaha ine Arengh parakataha.
“Dakopgre post office-o iandakgipa obostako anga chagrongna namen suk ong·jaha maina anga saksa songsalna kam ka·gipa ong·e dingtang dingtang kamrangni bidingo bang·en RTI-rangko ka·ahachim aro angna parcel sokbagipaba angni RTI-na aganchakgiparangonin ong·enggenchim. Indiba post office-o kam ka·giparang ango maming sing·cheng sanchengani gri angni parcel-ko watatpilaha aro ian kam ka·giparangni dal·bea gualani ong·aha,” ine FKJGP GHZ-ni president parakataha.
Arengh-ni parakatani gitade, ia obosta ong·ani ja·man ua Dakopgre jolrango donggipa manderango, uamang Dakopgre post office-oniko an·tangtangni bosturangko man·sorongama ine sing·sandie nion, uamangoni darangba nokona ra·ange on·ako man·soa dongja indiba an·tangtangsa post office-ona re·ange bosturangko ra·erongna nanga ine ma·sina man·aha.
“Uni gimin da·alo anga minggni sing·anirangko sing·na sikenga, uan skanggipade, ia Dakopgre post office-o gita post office-rang postman gri chalaina man·aiama ma iano kam ka·giparangsa an·tangtangni kamrangko name ka·jaengama? Gnigipao, post office-ona sokbagimin parcel-rangko dongimin somoi gita ra·ejagenchimode nokgipana u·iatchenggija post office-rang watatpilna man·aiama?” ine FKJGP GHZ-ni president, Tura Head Office-ni Head Post Master-o sing·doataha.