Tom·tomaniko ra·bapilnasa sorkari baksa agangrikna nisengenga: HNLC

SHILLONG: Tom·tomaniko ra·bapilna man·gen ine ka·dongani gnangsa a·dok aro ma·mong sorkarirang baksa agangrikna nisengenga ine Mongolbar salo, Hynniewtrep National Liberation Council (HNLC) bobil dolni dilgiparang parakataha.

Mongolbar salo, Umiam-o donggipa MeECL Inspection Bungalow (IB)-o press conference-ko ong·atanio kobor ra·timgipa manderang baksa agangrikengon, June jani skanggipa antio a·bachengna sienggipa agangrikaniona uamang an·tangtangko tarisoaha ine HNLC-ni dilgiparang parakataha.

Ia press conference-ko ong·atanio HNLC bobil dolni vice chairman Manbhalang Jyrwa, political secretary Aristerwell Thongni, uamangni personal security officer (PSO) sakgni Storgy Lyngdoh aro Raymond Lapang baksana sorkari baksa agangrikna gita HNLC-ni ku·baltitimgipana songako man·gipa aro HNYF-ni president Sadon Blah-ba dongpaahachim.

Sorkari baksa ‘ceasefire’-na songgigrikani bidingo janapatengon, uamang tom·tomaniko rakkiangna aro sorkari baksa agangrikna gitasa iako songgigrikaha indiba ian uamang an·tangtangko bame on·aha ine miksonga ong·ja ine HNLC-ni dilgiparang parakataha.

Khasi manderangko chel·chakna gitasa uamang skangonin kamko ka·aha aro mikkangchiba jattangko aro a·songtangko warachakna kamko ka·angkugen ineba uamang parakataha.

HNLC bobil dolo da·o badita sak membor-rang dongkuenga ine sing·anikode uamang aganchakna gita jechakskaaha.