TURA: Chatro chatrirangna biaprangko on·dapna aro National Education Policy 2020 (NEP 2020)-o pangchake, da·o gital academic bilsionide Tura Don Bosco College-o ‘Evening Shift’ ba attamni class-koba kulignok ine kobor on·aha.
2020 bilsioba COVID-19 sajinmani bidingo ia college, chatro chatrirangna lekka porani cholrangko on·na miksonganio morning shift ba pringni class-koba a·bachengahachim.
Indake ong·engon, Garo Hills-ni ning·o donggipa college-rango chatro chatrirangna biaprang tikjaengani gimin, chatro chatrirangna biaprangko on·na man·na gita ia college-o evening shift-koba kulina tik ka·aha ine Tura Don Bosco College-ni Principal Fr Bivan Rodriques Mukhim parakataha.
“NEP 2020-o mongsonggipa niamrangoni mingsade, college-rango bilsi brini degree program-ko on·na gita komibeoba sak 3000 chatro chatrirang dongna nanga. Uni gimin evening shift-ko kulianichi chinga ia niamko chu·sokate Garo Hills-ni chatro chatrirangna nangenggipa degree program-ko on·na miksongenga.,” ine Fr Mukhim parakataha.
Fr Mukhim-ni parakatani gitade, Don Bosco College-ni evening shift-o bilsi batgimin chatro chatrirangnaba 5 percent seat-ko dongen.
“Chatro chatrirang jemangan dingtang dingtang a·selrangchi porairikna man·jae da·o bilsirang re·angahachim, uandakgipa chatro chatrirangnaba ia evening shift-o chinga 5 percent seat-rangko dongen,” ine Don Bosco College-ni Principal parakataha.
NEP 2020-ni niamo pangchake ia college, chatro chatrirangna summer aro winter internship-rangko ong·atna miksongenga ineba Fr Mukhim parakataha.
