Baghmara-o Yuva Utsav-ko ong·atanga

BAGHMARA: Sukrobar salo, India sorkarini Ministry of Sports & Youth Affairs-ni ning·o Baghmara-ni Nehru Yuva Kendra, South Garo Hills District Administration baksa nangrime District Level Yuva Utsav India @2027-ko Baghmara-ni Don Bosco Higher Secondary School Hall-o ong·atangaha.
Ia program-ko ong·atanio Tura-ni MP Agatha K Sangma, mongsonggipa sokgipa ong·e chadamberangna aganprakangengon, an·tangtangni changa sapanirangko ma·sie ra·china aro namao jakkale a·songna mikkim rasongko ra·bachina gita didianiko on·angaha.
Ia Yuva Utsav program-ara chadamberangna uamangni changa sapanirangko ra·dona gita cholko on·na India sorkarini a·bachengatgipa program ong·a ineba Sangma talataniko on·angaha.
Chadamberangko namao dal·atna aro namgipa ramako mesoke on·na Meghalaya sorkariba chadamberangna dingtang dingtang program-rangko a·bachengataha ine janapatengon, a·doko lekka pora aro dingtang dingtang kamrangko namdapatna gita sorkari kamko ka·enga ine Tura-ni MP parakataha.
Mobile phone-rangko jakkalanio namgni aro namgijaniba donga ine janapatskaengon, social media-rangko namao jakkalchina aro an·tangtangna skie ra·nasa cholko ra·china Sangma didiangaha.
Ia program-ko ong·atanio Health, Education, Horticulture, Agriculture, DCIC, Banking Service aro uandakgipa dingtang dingtang stall-rangkoba donaha aro ia salo rong nongsusaani, noksa salsusaani, poedo sesusaani, Mobile-chi photo ka·susaani aro uandakgipa dingtang dingtang susaanirangkoba ong·atangaha.
Ia Yuva Utsav program-ko ong·atanio South Garo Hills a·jani Deputy Commissioner Shivansh Awasthi, NYKS-ni Director Linda BK Sangma, Tura Municipal Board-ni Chairman JD Shira aro gipinrangba aganprakangaha.