SHILLONG: Da·o dongenggipa Meghalaya a·dokni Job Reservation Policy-kon kakket aro bebeo ja·rikchina gita a·dokni gitcham chief minister aro Trinamool Congress (TMC)-ni dilgipa Mukul Sangma didiataha.
Ia sal somoirang dingtang dingtang dolrang, Reservation policy-ni bidingo jera ra·griktokengani gimin an·tangni suk ong·gijaniko parakatengon, a·dokni pagitchamrang, pilakni nangani krisa reservation policy-ko tariahachim ine Sangma parakatenba, ia sal somoirango manderangni neng·nikaniara ia reservation policy-oma ma kamrangko chu·onga gita nakatate on·na man·jaengani giminsama ine sing·doataha.
Sorkari kamrangko pilaknande tikate on·na man·jawa ine talataniko on·angengon, ia sal somoirango kamrangko ka·e cha·na sandienggipa chadamberangna cholrangko on·anisa mongsonggipa nanganide ong·enga ine Sangma parakataha.
Reservation policy-ni bidingo mitam TMC MLA-rangni agananiara uamang an·tangtangni chanchianiko agananisan ong·aia aro Meghalaya TMC-ni gita agananide ong·jaenga ineba ua talataniko on·angaha.
Kamko jegalgipa aro namnikgipa dolrangde dongaigen ine janapatengon, maikoba ja·ku de·na nangenga ong·ode uan pilakni ra·chakna man·gipasa ong·na nanggen ine TMC-ni dilgipa parakataha.
Ia reservation policy-ni namgniko badiaba jatrang man·jaengama ine sing·doatengon, reservation policy-o maiba komiani ba namdapatna nanganirang donggenchimode uarangko namdapatani giminsa pilakan chanchina nanga ine Sangma parakataha.
“An·ching Meghalaya a·doko songdongenggipa manderang ong·e Khasi, Jaintia, Garo aro pilak jatrangan apsan nokdangni manderang gita ku·cholsan ong·na nanggen aro a·dokni namgninasa kamrangko chu·sokatna nanggen,” ine Sangma aganaha.