SHILLONG: Himachal Pradesh aro Karnataka election-rango chegipa ong·anichi Congress dol bilakbatatako man·ahaoba re·baenggipa bilsio ong·atna sienggipa Lok Sabha election-ko Meghalaya a·dokni Congress dol altuae ra·jawa ine parakataha.
Meghalaya a·doko Congress dol da·o dipet Meghalaya Pradesh Congress Committee (MPCC)-ni president Vincent Pala, Shillong-ni Lok Sabha MP ong·engachim ine nikna man·a.
Mikkang bilsini Lok Sabha election-ko Congress dol altuae ra·jaenga ine janapatengon, “Election ge·antian rakgipa election ong·aia aro chinga bilo ong·mitingoba aro bilo ong·jamitingoba election-ko altuae ra·rongja,” ine Congress Legislature Party (CLP)-ni dilgipa Ronnie V Lyngdoh parakataha.
Himachal Pradesh aro Karnataka a·dokrango manderang Congress dolko seokahani gimin da·o manderang, BJP dolna bate Congress dolko seokon nambata ine ma·sina a·bachengengaha ineba Lyngdoh parakataha.
BJP-ni kamrangko matnange aganangengon, “A·songo namroro silroroanikosan nangaia ong·ja indiba skangonin India a·songo dingtang dingtang jat aro toromni manderang meli nangrimao songdongbagiparang ong·ani gimin dingtang dingtang jat aro toromni gisepo meli nangrime janggi tanganikoba nanga. Badia a·songo an·ching iandake dingtang dingtang toromo bebera·gipa manderangni apsan meli nangrime janggi tanganiko nikna man·a?” ine CLP-ni dilgipa sing·doataha.
A·songo songdongenggipa manderang dingtang dingtang toromo bebera·giparang, dingtang dingtang ku·agananirang aro daka rikanirang dingtanggrikgenchimoba tom·tomanio janggi tanggiparang ong·na nanga ine janapatengon, iandakgipa janggi tanganiko a·songni manderangna Congress dolmangmangsan on·na man·aia ine Lyngdoh parakataha.