Resubelpara: Resubelpara Mendipathar-ni Dilma A·palo Sukrobar salo Minds Sanctuary ba Music Academy-ko kuliate on·angaha. Mendipathar-ni MLA Marthon J Sangma, Tura ADC Dolrich BG Momin aro minsinggipa singer Browny R Marak- uamangni dongpaanio Music Acadaemy-ko a·bachengate on·angaha.
Marthon J Sangma, tom·anio aganprakmitingo, Minds Sanctuary-ko oprakatanina kusi ong·ako janapate, ian jolni manderangni namgnina ong·a, chadamberangnasan ong·aija bilsi bregimin ba gimik bilsini manderangna namgni ong·tokgen. Jemangan music-ko professional level-ona ra·doangna miksonga, uamangna nambegipa platform ong·a.
A·jolo music-ni a·bao changgipa sapgiparang bang·bea indiba platform dongjani a·sel changa-sapanirang indin bon·anga. Indiba ia academy-ko kuliataniara, music-o changgipa-sapgiparangni changa-sapaniko namdapatgen, ine Marthon aganangkuaha.
Uandake West Garo Hills Tura-ni Additional Deputy Commissioner, Dolrich BG Momin, jean tom·anio guest of honour ong·e bak ra·angaha, academy-ko kuliatani gimin parakatengon, “Minds Sanctuary, jolni manderangna nambegipa chol ong·a, music-ko professional level-ona ra·anganio bang·arangna dakchakbegipa ong·gen.” Indake ong·engon chadamberangko ia academy-ko an·tangtangni namgnina jakkalangchina didiangaha.
Minds Sanctuary-ni Director Tengrang R Sangma, ia academy-ko kulina cholko man·anina jolni manderangko mittelangaha. Aro ia academy-ni miksonganirangko talate on·angaha.
Minggipin ia academy-ara Trinity College of Music, London baksa bakrimgipa ong·a, aro academy-ni porikkako apsan ong·atgen.
Academy-o enroll ka·na gita ba biming segatna je bilsini manderang man·aigen, je bilsini ong·genchimoba music-na gisik nanggiparang bak ra·na man·tokaigen ine director u·iataha.
Indake ia bilsi June 21 tariko world music day-ko gisik ra·anio ia academy-ko manigen aro workshop-ko ong·atgen.
