SHILLONG: Naljokgnina aro tangka paisani obostako tang·doatna gita Bangladesh baksa an·pagipa Meghalayani sima arirangko, Ma·mong Sorkarini develop ka·aniko ba namroro-silroroataniko nangnike Minister in-charge Border Area Development, Rakkam A Sangma aganaha.
A·songni sima arirangko namdapatanina Ma·mong chamgimin budget-rang dongachim, india iako bang·a bilsirangonin dontongaha ine Sangma aganaha. “Ia programko dakangkuna chinga GOI-ni aganako sengenga. Haida ia jaon Ma·mongni Ministry-oni aganchakataniko man·naba donga,” Minister aganaha.
“Bangladesh baksa sima ario an·pachake donggipa biapni obostarangko niatgenchimode an·chingni chanchisoa gitan ong·srangja, an·chingni manderang da·oba bading-chiwalna, pala botaniko dakna, sanna banna gita Bangladesh-ona re·angenga haida niamgri bading-chiwalanirangkoba dakenggen, indiba knalo niamgri napbagipaba donggen,” ua agandapaha.
Bobil dolrangni bidingo aganengon, “Bang·bata bobil dolrangan, Banglades-ona ga·batangna angni constituency-kon cholguga dake jakkala, kenbegnigipa Dristhi Rajkhowa-koba angni constituency-onikon rim·a aro bang·bata time chadrapanirangba angni constituency-ona ong·a maina ian Bangladesh baksa an·paa aro bang·bata somoion bobilrang ia gita Bangladesh-ona ga·batanga,” Minister aganaha.
Ua indakeba aganaha je, sima arirangko namdapatjana kingkingde, sima arirangko chel·chakna man·ja, ukode ma·mong gisik ra·na nanga.
Sima arirangko namdapatani somoi ong·engaha, Dawki-o trade centre-ko kuliode Meghalaya-ni obostako dingtangatgenchim ineba Minister aganaha.
