SHILLONG: A·doko Sorkari office-rango employee-rangni kam ka·ani bewalrang namjaengani gimin bang·a matnangengon, GAD Minister, Rakkam A Sangma, employee-rangna aganaha je, uamang manderangna kam ka·nan office-o donga.
A·dokni Sorkari office-rango employee-rangni kam ka·ani bewalrang namjaengani bidingo koborni manderangna aganengon, namdapatna nanganirangde pangnan dongaia, unomitingo bang·a employee-rangan kang·kare kae kamrangko ka·enga aro kamtangtango kusi ong·enga, Minister aganaha.
“Neng·nikanirangde dongaia, indakgipa neng·nikanirangko chinga jako ra·gen” ine aganenba employee-rangna gisik ra·ataniko on·engon, uamang office-o manderangna dangdike on·na gita donga, unigisepon manderangna uandake a·dokna dangdike on·engon, uamang an·tangtangko chu·ongnikatna nanga, Sangma aganaha.
“ Sorkarini pilak employee-rangon, mandena dangdike on·aniara Isolna dangdike on·an ong·a ine ma·siani gisik dongna nanga” ine aganengon, an·tangtangni nambatgipa changa sapanichi bil ama gita manderangna dangdike on·na gita ian Sorkari employee-rangni daito ong·a, Minister aganaha.
Iarang baksanaba Minister agandapkua je, tribal-rango dingtangtegipa dakbewal gnang, uamango mande jatna dangdike on·a namnikani donga, iandakgipa bewal Sorkari employee-rango dongna nanga.
