SHILLONG: 2022 bilsini May jao on·gipa Reservation roster-ni office memorandum-ko Mongolbar salo, Meghalaya Cabinet taridapenba, kamo ra·ani kamrangko a·bachengpiltaina tik ka·angaha.
Reservation roster-ni office memorandum-ko talatna gita Mongolbar salo, reservation roster-ni office memorandum-ko Cabinet taridapaha ine janapatengon, “Reservation roster-ni office memorandum-ko da·o Cabinet taridapahani gimin da·o salsa salgnini gisepon reservation roster-ni office memorandum ong·katgnok aro uni ja·mande dingtang dingtang department-rango kamo ra·aniko a·bachengpiltaina man·gnok,” ine Chief Minister parakataha.
Chief Minister-ni parakatani gitade, 2022 bilsini May jao on·gipa office memorandum-ko da·o taridapengahani gimin ia office memorandum-o dingtang dingtang nanganirangkoba man·chapgnok aro iako sorkari jinmana talate on·anggen.
Ia taridapgimin office memorandum-o pilak political dolrangni ku·pattianirangkoba man·chapataha ineba Chief Minister parakataha.
Job Reservation Policy-ni roster system-ko ra·gatani bidingo jinma chanchirimkujaskal pilak sorkari department-rangon kamo ra·aniko dontongkuchina dabienggipani gimin janapatengon, “Kamo ra·ani kamrangkode dontongna man·jawa maina kamo ra·aniko dontonggenchimode kamna dorgasto galenggipa chadamberangba bilsirang re·angskagnok aro chadamberangsa neng·nikanirangko chagrongna nangskagnok,” ine Sangma parakataha.
Roster system-ni gimin talataniko on·angskaengon, “1972 bilsio reservation policy-ko a·bachengataonin roster-de donga aro iakon indita bilsirangna ja·rikbaaha. Mitam kamrangode badiaba jatrangchi gapataha aro mitam kamrangode gipin jatrangchi gapataha. Ia kamrangko jedakeba gapatchina indiba da·alo roster-ara bano ong·enga uko ma·sina gita roster plotting-ko nanga aro iachi an·ching da·o badia serial number-oni a·bachengna nangenga, uko ma·sina man·gen,” ine Chief Minister parakataha.