SHILLONG: Manipur a·doko so·sojengjeng ong·engani a·sel Meghalaya a·doko Hynniewtrep National Liberation Council (HNLC) bobil dol baksa agangrikaniko ma·mong sorkari dontongatchengna nangao ga·akenga ine Mongolbar salo a·dok sorkari parakataha.
Koborko on·ani gitade, Manipur a·doko so·sojengjeng ong·anirangko bon·atna aro tom·tomaniko ra·bapilna gita ma·mongni Home Affairs Ministry, kamrangko ka·chengna nangengani gimin da·o HNLC bobil dol baksa agangrikaniko dontongchengna nangenga.
“Manipur a·doko ong·enggipa obostarangni a·sel chinga adita neng·nikanirangko chagrongna nangaha. Manipur a·doko so·sojengjeng ong·anirangko namatpilna gita Home Affairs Ministry, rakbee kamrangko ka·enga aro iako na·simang pilakan ma·sia. Iani a·sel da·o chinga kamrangko ka·chakatna man·kujaenga,” ine Meghalaya a·dokni Chief Minister Conrad K Sangma aganaha.
HNLC bobil dol baksa ma·mong aro a·dok sorkarirangni agangrikaniko June jani skanggipa antion a·bachenggnok ine re·anggipa jaosan a·dokni Chief Minister parakatahachim ine nikna man·a.
Iani bidingo a·dok sorkari, Home Affairs Ministry baksa agangrikjringenga ine talataniko on·angengon, HNLC bobil dolko tom·tomaona rimbapilna gita kamrangko a·bachengatna ma·mong sorkariba jotton ka·enga aro Manipur a·doko obostarang namkalahaon HNLC bobil dol baksa agangrikaniko a·bachengatna man·gnok ine Chief Minister parakataha.
“Anga bebera·a chinga ia kamko ta·raken a·bachengatna man·gen,” ine ua aganaha.
HNLC bobil dol batanggimin bilsi 40 ong·na sipile dakgrikengahani gimin sorkari baksa agangrikaniko sikkele dakna man·jawa ine adita salrangna skangsan HNLC bobil dolni ku·baltitimgipa Sadon K Blah parakatahachim.
Sorkarini kamrango dingtang dingtang neng·nikanirang dongkuengani a·selsa tom·tomanina agangrikaniko a·bachengatna man·ningjaenga ineba ua aganahachim.