AMPATI: Jal Shakti Abhiyan-ni ning·o da·o ia bilsini wachi kario chi ripingani kamrangko apalbatatna gita ma·mong sorkari miksongengani gimin South West Garo Hills a·jao ia scheme-ni ning·o ka·enggipa dingtang dingtang kamrangko ma·mongni re·bagipa sakgni central nodal officer-rang Budbar salo niangaha.
Ma·mong sorkarini watatako man·gipa official-rangara, Tourism Ministry-ni Joint Secretary MR Synrem aro Jal Shakti Ministry-ni ning·o donggipa CGWB-ni Scientist-C (HG) Shasinlo Kent ong·a.
India a·song gimiko chi man·batsrangjaenggipa dam 150 a·jarangoni South West Garo Hills a·jaba damsa ong·engachim aro South West Garo Hills a·jani Zikzak C&RD Block baksana Betasing C&RD Block damgniko nambate nirokna nangenggipa biaprang ine parakmanahachim.
Iandake china dilbatsrangenggipa a·jarang aro block-rangko nambate nirokna miksonganio Jal Shakti Ministry-ko 2019 bilsio ma·mong sorkari a·bachengatahachim.
Indake ong·engon, South West Garo Hills a·jao aro mongsongbate songadam nokadamrango chirangko ripinge rakkina aro Jal Shakti Ministry-ni jako ra·e ka·enggipa Jal Jeevan Mission (JJM)-ni kamrangko nipilna gita ma·mongoni re·bagipa official-rang, dingtangmancha tom·aniko Ampati Circuit House-o ong·atangaha aro ia tom·anio PHE, Water Resources, Soil & Water Conservation baksana SWGH a·jani Additional Deputy Commissioner RZD Shira, a·jao ka·enggipa water conservation project-rangni bidingo agan-talate on·angaha.
