TURA: Budbar salo, Border Guards Bangladesh (BGB)-ni sipai sakgni, niamrangko pe·enba India a·song ning·o ga·akgipa South Garo Hills a·jani Rongara Imbloka ba Waek minggipa songona re·napbaaha aro uandaken ja·mano songni manderang baksa adita nanggrikangaha.
Koborko man·soani gitade, Budbar attamchibara 3:00 bajimango, BGB-ni sipai sakgni, silchidare aro gol·dikrangko ra·e South Garo Hills a·jani Rongara Imbloka songona re·napbaaha aro nokantiona re·e manderangko sing·sandina aro nokrango nape sandina gita a·bachengaha. Ia sipairangni iandake songni manderangko sing·sandiehani gimin ja·mano songni manderang ka·a ding·chaoenba, BGB-ni sipai sakgniko a·rikgalataha.
Iani bidingo koborko man·soa bakan India a·songni simarangko nirokenggipa Border Security Force (BSF), BGB-ni official-rangna koborko on·ataha aro dolgnini gisepo flag meeting-ko ong·atenba ia obostako namgrikaona ra·bana man·aha.
Ia tom·anio BGB-ni official-rang, India a·songona niam gri re·napbagipa sipai sakgnini kosako rakgipa ja·kurangko de·naba ku·rachakangaha ine kobor on·aha.
Iani bidingo South Garo Hills a·jani Superintendent of Police (SP) Abraham T Sangma-o kobor ra·timgiparang sing·sandiaton, iani bidingo talbate ma·sina gita dolsa police-rangko ua biapona watataha ine parakataha.
Ia a·selko BSF jako ra·aha ineba Sangma parakataha.