SHILLONG: A·dokni a·paloniko na·tokrangko ra·bae paljachina sal 15 salrangna sorkari champengataha, indake ong·oba joltangni na·tokrangko ra·bae palani maming namgija ong·jawa aro a·joltangni na·tok jilgiparang uamangni jilgipa na·tokrangko palna nambatgipa chol ong·skagen ine joltangni na·tokrangko palna gita a·dok sorkari chol on·angskaaha.
District-ni gisepo na·tok jilgiparangoniko bajarona joltangni na·tokrangko palchina tik ka·e on·china Fishery Department, pilak Superintendent of Fisheries-na lekkarangko seataha.
Shillong songjinmao aro Tura jilaona joltango jilgipa na·tokrangko supply ka·na tarie on·ani on·na kamrangko ka·china aro anti antini gita department-na na·tok palani report-rangkoba on·china gita district-rangko aganaha.
Na·toko formalin samko on·ani report-ko man·ako nike sal 15 salrangna a·dokni a·paloniko sam on·gipa na·tokrangko ra·bae paljachina aro supply ka·jachina adita salna skangmangmangsan a·dok sorkari champengataha.
Adita bilsirangna skango Meghalaya sorkari na·tok jile man·anirangna Meghalaya an·tangtangon chu·onga gita man·a amna gita miksonge Meghalaya State Aquaculture Mission-ko a·bachengataha indiba scheme-ko a·bachengatani ja·mano a·doko a·dokni a·paloniko ra·bagipa na·tokrangon pangchakbataiaha.
Na·tok baksana bang·a manderangan matchu aro wak be·enrangkoba cha·a indiba matchurang bigilo sabisi man·ani a·selo aro wakrangoba African Swine Fever man·e sianichi matchu-wak be·enrangkoba manderang cha·na kenenga aro komienga. Do·o be·enko cha·ode maming gipin chol dongjae songjinmao do·o palgiparangosa sikket-changket dakpilengako nikskaenga.
