SHILLONG: Reservation policy-ni bidingo constitution-ni gita, ainni gita, manderangni jelbra jelsuani gita, songsalni gita aro lekka poranio ja·manchakani gitaba dingtanggrikanirang dongenga ine United Democratic Party (UDP)-ni general secretary Jemino Mawthoh parakataha.
Reservation policy-ni bidingo dingtang dingtang dake chanchiani aro ia neng·nikaniko mai dakgipa cholrangchi namatna man·gen, uarangni gimin janapatengon, “Angni nikani gitade reservation policy-ni bidingo constitution-ni gita, ainni gita, manderangni jelbra jelsuani gita, songsalni gita aro lekka poranio ja·manchakani gitaba dingtanggrikanirang dongenga,” ine Mawthoh parakataha.
“Meghalaya a·doko pilak jatrangnan maikai mikkang niteani grigipa, kragipa aro ra·chakna man·gipa policy ba niamko ra·gatna man·gen, ukosa nina nangenga,” ine UDP-ni general secretary aganaha.
Namatna nangenggipa dingtang dingtang neng·nikanirangba donga ine janapatengon, a·doko kamgri ong·e dongenggipa chadamberang batroroengani aro kamrangko ka·e cha·na cholrangko man·gijaniara namen jajrengna nangenggipa kamrang ong·enga ine Mawthoh parakataha.
“An·ching chadamberangni neng·nikanirangko namatna aro uamangni bilrangko namao jakkalna gita name chanchibewalna nangenga. Bilsiantian hajalni hajal chadamberang graduate ong·tokenga aro uamangni poraianirangna koros ka·anirang indin ong·gramna gita nangja,” ine ua aganaha.
Mawthoh-ni aganani gitade, bang·rorobaenggipa chadamberangna kamrangko ka·e cha·na man·na gita gipin cholrangkoba sandie, private company-rangkoba okamatna nangenga.
“An·chingo cholrang donga aro batanggimin bilsirango an·chingni bikotgipa neng·nikanirangko bon·atna gita an·ching da·o a·dokko namao re·dilna nangenga,” ine UDP-ni general secretary parakataha.
1972 bilsini job reservation policy-ko nipilaianichide a·doko chadamberangni kamgri ong·e donganiko namatna man·jawa aro pilakni gitan kamrangko namdapatna nangenga ine UDP parakataha.