SHILLONG: 2021 bilsio Shillong-o donggipa Food Corporation of India (FCI)-ni bosta lak 1 merongrangko Kamrup a·jani Boko-o donggipa private godown-oniko rim·ani ja·man ia merongrangko ong·gija kamrangna jakkalsretaha ine matnanganiko kakket ong·ja ine jegalatahani gimin National People’s Party (NPP)-chi dilenggipa Meghalaya Democratic Alliance (MDA) 2.0 sorkariko Opposition Trinamool Congress (TMC), Robibar salo matnangataha.
Ia gital MDA 2.0 sorkariko rikaoni da·o sal 100 ong·na sipilengahaoba a·doko bijolirangko name man·jaenga, kamrangkoba man·jaenga, chirangkoba man·jaenga aro da·o sorkarini ong·gija kamrangkoba jegalna jotton ka·engaha ine TMC parakataha.
“Ia sorkari, ning·tue sandiani report-rangkoba jinmana parakrongja aro da·o a·dokni manderangna nambate dangdike on·ani pal ong·gija dakgipa kamrangko jegale an·tangtangkosa name mesokskana jotton ka·enga,” ine Robibar salo, Meghalaya TMC-ni vice president George B Lyngdoh parakataha.
Adita salrangna skangsan, 2021 bilsini ‘Rice Scam’-ko Meghalaya a·dokni Social Welfare Minister Paul Lyngdoh jegalatenba, iani bidingo matnanganiara maming pangchakani gri matnanganisan ong·aia ine parakatahachim.
Uni iandake parakataniko jegalatskaengon, “Rice scam-ni bidingo ia sorkarini jegalaniara maming gital katta ong·ja maina ia sorkari pangnan an·tangtangni ong·gija dakgipa kamrangko iandaken jegalrongaia,” ine TMC-ni dilgipa parakatskaaha.
ICDS centre-rangona sokangna nanggipa FCI-ni merongrangko 2021 bilsio Assam-ni private godown-oniko man·aniara namen aiao inmanani ong·aha ine janapatengon, “Ia merongrangko rim·ani ja·man Chief Minister an·tangan press conference-ko ong·ate, iani bidingo name sandirokna nangenga ine aganmikaha. Assam-ni godown-oniko Assam sorkarini rim·gipa Meghalaya FCI-ni merongni bidingo maini gimin ua ta·raken press conference-ko ong·atna nangaha?” ine TMC-ni dilgipa sing·doataha.
Ia Rice scam-ko a·dok sorkarini jegalenganina sing·doatengon, “Da·o ia gital sorkari, ia pilak matnanganirangko dongnuna jotton ka·taiengaha aro da·o pilakan iako bebera·e rice scam dongja gita chanchitokengaha,” ine Lyngdoh parakataha.