TURA: Samtangtango ong·telaigiparangko aro mongsongbate buring bolgrimrangko nisie galengani a·selsa Garo Hills-o ding·anirang batroroengaha ine Sombar salo, Centre for Environment Protection & Rural Development (CEPARD) parakatenba, buring bolgrimrangko aro chiring chibisikrangko skatang nisie galna man·jana gita rakbatgipa niamrangko ra·gatchina a·dok sorkariko didiataha.
CEPARD-ni parakatani gitade, Garo Hills-ni buring bolgrimrango donggipa bol wa·arangko, chiring chibisikrangko aro uandaken samtangtango ong·telaigiparangko skatang nisie galahani a·selsa ia somoirango chaktopilgija ding·anirangko chakna nangengaha aro iandakgipa kamrangko ta·raken champengna nangchongmotengaha.
“Samtangtango ong·telaigiparangko chel·chakaniara an·ching sakantini daitoan ong·na nangenga. Garo Hills-ni sam bolrangko, do·o matrangko aro chiring chibisikrangko ripingna gita an·ching pilakan apsan ku·cholsan ong·e ja·kuko de·na nangchongmotengaha. An·ching da·on ja·kuko de·jagenchimode an·chingni deritchu su·ritchurangna an·ching namjabatgipa a·gilsakkosa donangna siengaha,” ine CEPARD parakataha.
West Garo Hills a·jani a·kawe jolrango niam gri ro·ongrangko bikotengani gimin, niam gri a·arangko Assam-ona salangengani gimin aro ia jolrango niam gri bolrangko pale cha·anirang batroroengani giminba CEPARD, suk ong·gijaniko parakataha.
Samtangtango ong·telaigiparangko ripinganio pilakkon ku·cholsan ong·e bakrimchina gita didiatengon, Garo Hills-o niam gri bol wa·arangko pale cha·enggipa aro niam gri quarry-rangko chalaienggipa manderangni kosako rakbatgipa ja·kurangko de·china gita CEPARD, a·dok sorkariko didiatskaaha.