SHILLONG: Assam baksa an·pae donggipa sima arirangko tik ka·grikani bidingo chanchirimna songgimin West Jaintia Hills district-ni Regional Committee, uamangni report-rangko re·baenggipa August jani gisepo A·dok Sorkari pakwatna gita miksonge donangaha.
Indake Block I aro Khanduli-Psiar-ni ning·ogipa biaprango dingtanggrikanirangko tik ka·grikna man·genchim, uamangni bidingo ge·songgimin regional Committee mijal Shillong-o tom·e chanchirimaniko dakangaha.
Uamangni tom·e chanchirimanio, Deputy Chief minister Sniawbhalang Dhar Assam cabinet minister Pijush Hazarika mangna agreba, West Jaintia Hills District aro West Karbi Anglong District-ni Deputy Commissioner-rang, Jaintia Hills Autonomous District Council (JHADC) aro Karbi Anglong Autonomous District Council (KAADC)-ni memborrang aro dolgnichinin songni nokni headman-rangba dongpaaha.
Tom·ani ja·mano koborni manderangna ma·talate on·engon, sima ario dingtanggrikanirangko namatna gita cholrangko bikote kamrangko ka·chakatgnok ine Deputy Chief Minister aro West Jaintia Hills District regional committee Chairman, Sniawbhalang Dhar aganaha.
Regional Committee, kajia golmal gnanggipa biaprangona re·ange nigen aro indakgipa biaprango dolgni nangrime re·angenba agangrikanirangkoba dakanggen, Minister aganaha.
Report-rangko ia bilsi August jaon sorkarina pakwatna gita miksongengani gimin, Committee changsatai July jaon tom·aniko ong·attaigen.
Biaprangko on·sregrikani policy-ko dakgenma ine sing·on, committee da·o dipet mamingkoba chanchia dongkuja, a·jolrangona re·angenba manderangni ku·rangko knachengesa ku·cholsan jekoba tik ka·gen, Dhar aganchakaha.
