SHILLONG: June-ni 16 tariko ong·atenggipa Central University Entrance Test (CUET)-ko sena nangenggipa Meghalaya a·dokni mitam chatro chatrirangna Ranchi, Jharkhand, Jorhat, Dibrugarh, Kolkata aro uandakgipa biaprangosa porikka sechakani centre-rangko on·engani gimin CUET-ko seenggipa chatro chatrirangna ta·raken dingtang cholrangko tarichina gita National Testing Agency (NTA)-na ge·etaniko on·atchina ine a·dokni Chief Minister Conrad K Sangma, Union Education Minister Dharmendra Pradhan-na sedoataha.
Iani bidingo Union Education Minister-na sedoatengon, Meghalaya a·dokni chatro chatrirangna a·dokni a·palrangosa CUET-ko sena centre-rangko on·ahani gimin CUET-ko sena sienggipa chatro chatrirang bang·batan badi ka·tokaha ine Budbar salo, a·dokni Chief Minister, suk ong·gijaniko parakatenba, ia chatro chatrirangna a·doktangon ong·jaoba sepangkalgipa biaprango centre-rangko on·skachina didiataha.
Meghalaya a·dokni chatro chatrirangna CUET-ko sena gita Ranchi, Jharkhand, Jorhat, Dibrugarh, Kolkata aro a·songni salgipeng jolrango centre-rangko on·anichi porikkako sena sienggipa chatro chatrirang aro uamangni ma·a paarang jagokmanpilengaha ine janapatengon, ia chatro chatrirang sepangkalaon porikkako sena man·gen ine ka·dongsoani gnangsa porikkana tarisamtokahani gimin ian chatro chatrirangna namen ra·biani ong·engaha ine Chief Minister parakataha.
“June 16 tariko ong·atenggipa CUET-na June 14 pringosa admit card-rangko sokataha aro iani a·selan da·o chatro chatrirang, chel·gipa biaprangona re·ange porikkako sena gita somoirangko man·srapjawaha,” ineba Sangma parakataha.
Indake ong·engon, Meghalaya a·dokni dam 12 a·jarangon CUET centre-rangko kulichina gita ua NTA-ko mol·molataha ineba Chief Minister parakataha.